Estimadxs veciños e veciñas de Santa Cruz:

En primeiro lugar queremos darvos as grazas de corazón a todxs vós polos centos de
comentarios de ánimo e apoio nas redes sociais. Tamén aos centos de veciñxs e amigxs que durante toda esta semana se están dirixindo persoalmente a nós para felicitarnos e intentar que nos sintamos mellor. A rabia pola situación vivida a semana pasada mudou en orgullo e tranquilidade grazas a todxs vós. Tamén queremos agradecer o voso comportamento exemplar durante todas as festas; é unha mágoa que os actos dun grupo tan reducido de individuos alleos á festa, unidos á mala xestión municipal, poidan facer tanto dano.

Unha semana despois de ter que adiantar o horario de finalización das festas polo motivo que todas e todos sabedes, o Concello de Oleiros segue sen interesarse pola nosa situación. Estamos tremendamente decepcionados coa actitude do Concello de Oleiros, que en ningún momento durante esta semana fixo ademán de conversar con nós para a busca de solucións e a depuración de responsabilidades. Lamentamos profundamente as declaracións realizadas nestes días polo Sr. Alcalde, evitando enfrontarse aos problemas relatados no noso primeiro comunicado do día 28 de agosto e buscando xerar polémicas innecesarias e desviar a atención nos medios.

Intentar culpar do ocorrido a un evento como o Xacobebo que nada tivo que ver cos lamentables acontecementos das noites do venres 18 e martes 22 de agosto parécenos incorrecto. Ademais parécenos indignante que o Sr. Alcalde esquecese que o evento non aparece no cartel das festas porque así o rogou el mesmo na reunión previa ás Festas de Santa Cruz do ano 2019.

Atacar directamente a un membro da directiva da Comisión de Festas que regala o seu tempo e as súas vacacións en traballar gratuitamente para o seu pobo, e despois borrar esa parte dun comunicado nas redes sociais e páxina web municipal, é inadmisible. As continuas declaracións do Sr. Alcalde sobre o noso amigo, intentando desviar a atención cara inventados intereses electorais, só logran unirnos máis. Todos os comunicados da Comisión de Festas de Santa Cruz son redactados e consensuados entre toda a directiva, facer pensar á veciñanza o contrario parécenos indignante e perigoso.

Sobre a ausencia de efectivos policiais nas noites das festas, non queremos entrar a discutir o declarado polo Sr. Alcalde. Toda a veciñanza de Santa Cruz e doutras parroquias e concellos veciños que asistiron ao evento puideron comprobar as cifras das que falamos no noso primeiro comunicado. Resúltanos ridículo entrar en máis discusións sobre isto, cando resulta evidente para todos os asistentes que se cometeron erros por parte de corporación municipal. Queremos recalcar o noso agradecemento aos efectivos da Policía Local desprazados ás festas de Santa Cruz, que colaboraron en todo o que puideron pese a contar cun número de axentes totalmente insuficiente.

Lamentamos tamén que nin no comunicado oficial do Concello de Oleiros do día 28 de agosto nin en tódalas declaracións aos medios de comunicación non atopásemos nin unha soa mención sobre a falta de cooperación na procesión de subida do Ramo a Igrexa de Lians cunhas 300 persoas pola estrada sen seguridade, a falta de supervisión de puntos críticos, a falta de medios para controlar os espazos restrinxidos para o espectáculo pirotécnico ou os desafortunados berros proferidos polo Sr. Alcalde a un membro da directiva da Comisión de Festas de Santa Cruz mentres descargaba material na Praza Esther Pita. Nin unha soa desculpa ou aclaración unha semana despois.

Para rematar, queremos comunicar a toda a veciñanza e aos medios de comunicación que non entraremos en máis valoracións ou declaracións sobre o acontecido. Despois de dar as explicacións necesarias e debidas a todxs os veciños e veciñxs consideramos que o noso esforzo ten que seguir centrándose no traballo diario para converter o noso Santa Cruz nun lugar aínda mellor e deixar que sexa a veciñanza quen xulgue e valore todo o acontecido.

Coa tranquilidade que só da facer as cousas ben e obrar de boa fe e a firmeza que nos da o voso apoio, seguimos agardando que o Concello de Oleiros se poña en contacto con nós para explicar o acontecido e chegar aos acordos e conclusións pertinentes de forma colectiva e consensuada.

Grazas a todxs polo voso apoio e cariño, sen vós todo isto non sería posible.